ABANTAL OMBA’ SAGARA

Anggidan : Fendi Chovi

Oreng-oreng akompol e romana. Se lalake’ akompol e lowar sambi ngenom kobi anga’. Badha se toju’ e korse, badha se dhar-sandharan neng e lencak. Se bine’an, padha toju’ atempo, ngonjur e palemperra sambi akandha sakanca’an.

ilustrasi : abantal Omba' sagara

Baja laggu jareya, Sahmar esapot bannya’ oreng. Molae tan-taretanna dibi’, bala tatangga, kantos kanca jurungnga. Sahmar esengnga’ pare tempo entara mangkat ajurung ka tase’ mor lao’.

“Neserra ka Sahmar, bula ta’ mangga ngabassagi paserrona. Mandha’a sake’na,” saodda Jumadi, akandha kabadha’anna Sahmar se gi’ ta’ ngenneng epajaga. Leca’ agentang. Tedhung asapo’ sarong.

“Banne gun sake’, ganeko berteng ban daddi ta’ nyamanna ka badan,” nyaot Hatib, ajawab Jumadi.

“Sanonto juko’-juko’ e tase’ ce’ bannya’na. Tatangga dhulumanna, ollena dala agintalan. Sakeng iya jareya, sanonto angen nembara’ ce’ tandhessa, ce’ gasek matasellem sampanna oreng ajurung,” Hatib mokka’ careta.

“Enggi, bula keng gi’ ta’ ngenneng se alakowa. Sabab sampanna jaragan seggut kandhas, badha se kodu eyobai,” oca’na Jumadi. Aba’na arassa eman ta’ duli bisa noro’ alako ka tase’.

“Ba, dika mon terro alakowa maddha noro’ bula. Nyanduk ka’-lakka’ saare dhuare,” ca’na Hatib ka Jumadi, ngajak alako. Kabendherran jaraganna buto pondu amarga panglakona dibi’ badha se sake’.

Sahmar aserrowan e attas teker rakara. Badanna panas. Oreng-oreng noro’ neser. Sahmar andhi’ bannya’ tanggungan kaangguy nyokobi sabarundhut sana’-barajana.

“Dina, engko’ moleya ya, Mar. Ba’na mandar lekkasa nyaman,” oca’na Jumadi, sabelunna mole ban amet ka oreng-oreng. Binena Sahmar mator sakalangkong dha’ ka reng-oreng se entar nyapot lakena.

***

Saellana reng-oreng padha mole, robiyana Sahmar toju’ atempo e seddi’na, ngosap sokona ban neggu’ tanangnga se kacer. Sarongnga se ngalosot, epateppa’ nyoppre lakena ta’ kacelleban.

Sahmar tedhung ngonjur olo bara’ sambi aserrowan nagenne ngaronyo e garigi’ sokona. Binena ngosap bettesa ta’ bu-ambu. Sahmar gi’ aserrowan ngadhudhu sajan santa’.

Sar-asar maba, oreng-oreng abiliran adhatengngaan pole entar ka bengkona Sahmar, tamasok jaraganna dibi’.

“Manabi gi’ ta’ arassa nyaman, maddha sambi ka dhukon Japa, sopaja eparenge tamba panangko kaangguy lekkas baras,” oca’na Mahwi, jaraganna, sambi ngosap buggigga Sahmar.

“Bunten, ka’dhinto ampon para’ nyamana,” saodda binena, sambi acareta ja’ gella’, lakena lakar aserrowan sake’ sabadan.

“Bula akanca majang ban lakena dika abit onggu.  Rassana gi’ aba’ padha ngodha tor ora’na badan padha kowadda. Alajar ka polo-polo jau san-kassannagi,” Mahwi atotoran.

Molae gi’ ngodha, Sahmar lakar jat lebur ajurung. Bila badha kabar juko’ ekenneng, biyasana jaraganna duli akabar ka Sahmar, ngajak ajaring juko’.

Salaenna ajurung, Sahmar seggut noro’ nompo majang ka polo-polo se alenglenge Kabupaten Songennep. Dhari polo se paleng semma’ kantos se paleng jau, Sahmar seggut noro’, ta’ ketter sakale ka badhana omba’ se agulung.

Kantos teba settong bakto, Sahmar noro’ ajurung ka Polo Masalembu, polo se ce’ jauna dhari daradan Songennep, kodu ejalane sa’are samalem saengga tanduk ka kennengan gapaneka.

Saamponna abit ngenep akelem e tase’ Masalembu, Sahmar abali ngeba asel talebat raja. Ollena majang ontong parana.

Parjalanan alako ka polo-polo seggut matapencot atena. Dhimen, aba’na para’ tapencoda ka babine’ paraban raddin neng e polo. Asabab paraban gapaneka andhi’ kole’ pote ngamennyor, pajalanna lebur meltas manjalin, tengka gulina alos akantha bidadari. Robana ce’ esakka, seddha’ manes di-kadiya ngabas ngombarra bulan pornama. Nangeng reng towa dhuwa’na ta’ poron tor ta’ kengeng esambi alabala kalowar polo.

Pajat kalonta, polo-polo kasebbut menangka kennenganna juko’ tase’ se argana rang-larang, babine’anna din-raddin. Ta’ jamburungan se lako daddi caretana reng tokang jurung sa’amponna abali ka darat.

Ampon polowan taon Sahmar noro’ alajar ka Polo, kantos badha settong kadaddiyan, aba’na para’ nedda’a Juko’ Neppo se macambur ka bato. Ontong, aba’na salamet, nangeng kancana ta’ asangaja tagenja taker lep-taselep e penggirra tase’. Nyabana ta’ katolong, aba’na seda sa’ellana bubar ka darat.

Sabban alajar ka polo, Sahmar bajjra terros tor kapareng rajeke samporna. Parjalananna eparenge salamet dhari omba’ se gasek morak paraona oreng alajar. Salamet dhari angen raja se manyellem sampan.

Ampon bannya’ kadaddiyan, aba’na epasalamet katebanan musiba. Ta’ kalero, kancana nyebbut Sahmar andhi’ Jimat Sakte.

**

Tantona oreng-oreng padha takerjat, ngedhing Sahmar esengnga’ pare. Tan-taretanna dibi’ sareng tatanggana aromasa ta’ parcaja. Molae dhimen, Sahmar kalonta teggu dhari nga’-sengnga’na sadaja keban.

Polowan taon Sahmar nyandha’ rajeke dhari tana paseser. Tadha’ kabar aba’na esengnga’ macemma keban se badha e tase’. Gapaneka jugan, rajekkena kabilang ce’ banjurra kantos eparenge kellar maddek roma, masakola na’-potona. Sadajana ekaolle dhari mapolong obang ollena ajurung.

Jaman aoba, bannya’ oreng-oreng e disana ngalle dhari majang ka ajaga toko e Jakarta. Alako ka Jakarta, esebbut jalanna kabajjraan, ollena raja. Sahmar tapencot. Aba’na ngoddi ka Jakarta. Nyatana, kalakowan kasebbut ta’ ngontongngagi, Sahmar gasek etepo, esangaja oreng. Saenggana aba’na ta’ bajjra akadi majang. Sahmar mole ngeba otang kantos tokona ejuwal.

Pan-barampan are abidda, Sahmar ta’ alako sajjegga abali dhari Jakarta. Otangnga sajan apo’-tompo’, sabagiyan parabut romana ejuwal epagadi.

Kabadha’an aba’na kapeyarsa nespa, sadaja se korang nyennengngagi ekarassa teba ka Sahmar, odhi’na sang-tasangsang nyare panjer majar otangnga. Sahmar aserrowan kasta, aba’na ajanji ta’ kera abali ka Jakarta.

“Baramma mon dika noro’ bula alako majang pole,” saodda jaraganna, ngeding Sahmar ta’ abaliya pole ka Jakarta.

“Sanonto bula ta’ ajanjiya. Bula gi’ ta’ mekkera pa-napa. Odhi’na bula gi’ sal-sal,” saodda ka jaraganna se lamba’.

“Enggi, ca’na dika pon. Bila arassa tennang atena enggal duli abala. Edhantosa kabarra,” saodda, sambi matotok kobina.

Sahmar mangkat alako jurung akadi sabellunna. Sapa nyana, aba’na ketebanan mosiba. Esengnga’ Pare. Taseyarra kabar ka’dhinto, bannya’ oreng lir-biliran nyapot Sahmar.

“Dika baras, Mar. Baramma ma’ bisa esengnga’ pare. Pola kajunelanna ta’ eocol pole,” gellarra Dahnan, e bakto nyapot aba’na se gi’ paggun tedhung e attas kasor rakara.

Dahnan dhapa’ baja asar maba. Sabab, aba’na gi’ buru dhateng alako.

“Iya, ta’ arapa. Paleng la dhapa’ ka apessa tang aba’,” Saodda Sahmar sambi acareta ja’ aba’na mangkat tadha’ pekkeran bakal esengnga’ Pare.

“Iya, jareya gi’ pojur, ba’na gi’ salamet. Samenggu sebellunna, badha sampan talebbu. Jarmoddina se noro’ kantos sateya gi’ ta’ etemmo,” ca’na Dahlan, acareta.

“Enggi, Bula ngedhing keya kabar ganeko,” sambidda Sahmar ka Dahlan.

“Kantos sanonto gi’ bannya’ sampan-sampan se laen noro’ nyare ka tengnga tase’. Tape gi’ paggun ta’ etemmo jasadda,” saodda Dahlan.

Pole angen ce’ tandhessa onggu. Rassana mon aba’ ta’ ngastete toju’ dha-dhadha, ngalto’ keya ekebbat angen.

“Enggi, padhana ganeko pon, kabadha’an babbajana alako e tase’. Abantal omba’ sagara,” oca’na Dahnan.

Se kadhuwa adha-kandha ka bara’ ka temor bisareng tamoy-tamoy laenna. Sahmar gi’ paggun ta’ ngenneng toju’.

“Dika mandar lekkasa baras, gi. Sopaja bisa ajurung pole. Polana sanonto bannya’ juko’, ba’ari’ tatangga ngeba mole juko’ dala agintalan,” ca’na Dahnan, sambi apamedan.

Sahmar ker-pekkeran ka oca’na Dahnan. E bakto juko’ bannya’, argana larang, aba’na ta’ ngenneng alako amarga ecapo’ mosiba se ta’ eka-sangka.

“Pareng aba’ rassa teggen tor sabbar, Guste. Malar-moga mosiba ka’dhinto daddiya jalan tabukka’na rajekke abdi dalem sabarundhut. Amiin!” Sahmar aparnyo’onan dhalem atena.

***

NB: Cerpen di atas, yang dalam bahasa Madura disebut carpan (carèta panḍâ’), ditulis dengan ejaan hasil sarasehan 1973.

NGATON

Cerita Pendek : FENDI CHOVI

E TAON sangangpolowan kabadha’an e tang disa daddi settong careta se onggu lebur dha’ ka engko’ dibi’. Apapole bila enga’ dha’ ka Nyae Sonar.

Ekoca’ Nyae Sonar polana lamba’ tang nyae e bakto malem calemodan entar ka langgar ngamba’ sengko’. Tang nyae gun ngangguy conthang kaangguy oburra jalan.

Badhana conthang daddi matera’ dha’ jalan se petteng calemodan. Jalan jareya akaton kalowar sonar e bakto tang nyae lebat. Sabban malem nyae mangkat ngone’e sengko’ alomampa sampe’ engko’ bangal dibi’ mangkat ngaji. Jareya asal usul tang nyae olle jujuluk Nyae Sonar.

Ban pole, e dhalem odhi’na engko’, e taon jareya gi’ ta’ bannya’ oreng kellar melle sapedha motor ban masang lampu listrik e romana. Bannya’ kalowarga e disa gi’ odhi’ kalaban damar conglet. 

Damar jareya ekagabay dhari karena baddhana polas se aokoran kene’ se la mare eangguy. Gun cokop nambai eccop ebbanna sapedha pancal, etamba sombu ban mennya’ tana. Oreng-oreng la padha tera’ romana adamar.

ilustrasi : roma e disa

Bila la para’ malem Juma’at, tang nyae lako nyoro dha’ na’potona abanto ngobbar mennyan kaangguy nyonson padduna roma mon nyae ta’ duli rabu dhari pasar. Sabban malem Juma’at, tang nyae ta’ kera loppa se nyonsona. Biyasana mennyan jareya esaba’ ka seppet dhari buwana nyeyor se la kerreng. Marena alengleng ka sabban padduna roma, seppet gella’ esaba’ e paspasanna roma.

E roma, engko’ gun odhi’ sataretan badha tello oreng. Engko’ ana’ se nomor tello’. Ana’ se paleng ngodha. Eppa’ ban embu’ rangrang badha e roma asabab emo’ nyare lako.

E settong are engko’ atanya ka nyae e bakto nyonsona ka padduna roma. ”Nye, aponapa ma’ kodu nyonson roma sabban Juma’at?”

Etanya padhana jareya, nyae ta’ duli nyaot. Nyae ngabas ka engko’. ”Iya, sopaja babaja bisa enga’ se moleya ka bengkona,” ca’na nyae.

Bakto jareya pekkeranna engko’ gi’ ta’ dhugga, apa se ekoca’ babaja mole ka bengko. Engko’ buru ngarte e budhi are saellana epangaji ka langgar. Engko’ buru ngarte apa maksodda tang nyae. Molae engko’ laher ka alam dunnya, engko ta’ toman nengale robana tang kae. Asabab, kae la tadha’ omor.

Ca’na nyae se acareta dibi’ ka engko’, kae tadha’ omor e bakto ngala’a dhaunna rakara. Baramma careta se saongguna ta’ ecareta’agi. Apa tabaliccer, apa sake’ cethak, apa badha olar e bungkana tarebung? Pandha’ careta, kae labu dhari attas bungkana tarebung. Daddi pesanna e kennengngan palabuwanna jareya gun se ekacareta tang nyae.

”Ba’na dhaggi’ nyonson, ya, Na’. Pola engko’ gi’ ta’ dhateng abalanja dhari pasar. Ja’ lako ambu soro, ya,” ngoca’ nyae. ”Apa pole embu’na ba’na ta’ kera duli dhateng se alako noro’ aderrep e saba. Eppa’na ba’na ta’ tao mole-mole se alajar ka polo.”

Ca’na nyae, mon roma lako esonson sabban malem Juma’at, jareya ngolok babaja kaangguy mole ban ngabas na’potona se badha e eromana. Sabellunna nyonson, nyae ngobbar mennyan kalaban nyebbut nyama tong-settongnga bangaseppo se la tadha’ omor. Kadhang sampe’ lebbi tello polo oreng se esebbut. Marena nyonson ka padduna roma, seppet se gella’ daddi panyaba’anna mennyan esaba’ e adha’na taneyan.

Tang nyae marena nyonson biyasana ater-ater kakanan ka tatangga. Biyasana gun tajin ban karopok, kadhang guringnga geddhang ban sacangker kobi. Kabiyasa’anna nyae aba-rebba padhana jareya elakone para’ baja magrib sabban are Kemmes.

”Engko’ aba-rebba saongguna tadha’ laen, pangarep malar mandar odhi’na na’poto bisa eapenge moso babaja,” saodda nyae.

Badha kadaddiyan, e settong are rassana nyae duka onggu. Engko’ ban kaka’ padha loppa se nyonsona. Dhu, ella noro’ tako’ aba’ egigiri sakellarra nyae asowara.

”Kaenga’e, Cong !” sowarana nyae ekaedhing ce’ ranyengnga.

”Salaenna nyonson, ba’na ja’ momos se entara ngaji ka makamma kaena,” nyae maenga’.

”Du’aagi kaena se la badha e alam kobur. Pola kalaban du’ana ba’na bisa matera’ e dhalem koburra.

”Ja’ anowa, apa gunana engko’ mangaji ba’na ka langgar, mon ta’ kenceng ngaji ka makam bangatowana?”

Kadhang engko’ ngeding sowarana nyae molar kadibi’an e pangkeng. Se etangese tadha’ pole salaenna kadaddiyan kae ngaton ka aba’na.

”Kaula anapa ma’ kodu ngaji ka makamma kae ros-terrosan?”

”Iya, sopaja ba’na enga’ ka bangatowana. Ka’-lekka’ bisa tao ka kennengngan koburanna.”

Mon kaula gun adu’a dhari roma, napa kalero? Kan padha dhapa’ ka salerana, Nye?”

”Lebbi bagus ba’na entar ka koburan. Mon koburan ta’ eentara na’potona bakal daddi alas. Bakal sella’ etombuwi rebba ban ka’-bungka’an.”

Lamba’ kaena apessen ka sengko’, Cong. Gi’ kabbi padha baras. E bakto jareya embu’na ba’na gi’ ta’ akabin. Ba’na gi’ ta’ laher ka alam dunnya.

’na tamaso’ oreng se lebur abanto oreng-oreng e dhinna’. Tadha’na kaena ba’na daddi kaelangan onggu ka masarakat, otamana ka engko’ dibi’.

”Engko’ dhuson ongguwan, mon ba’na ta’ enga’ se ngerema Fatihah ka kaena. Jarowa emba onggu ja’ senga’ ba’na ban kaka’na padha kacapo’.”

”Iya, baramma pole mon la dhapa’ ka janjina pasthe tadha’ omor,” ngoca’ nyae sambi’ ngarembang aeng socana.

Engko’ ta’ nyaot sakale. Gun ngedhingngagi.

”Pessenna kaena ba’na ka engko’, Cong,” saodda nyae.

”Kaena ngarep ba’na kabbi daddi reng bagus ban teppa’. Nyare elmo pabannya’ sopaja paraddu ka masarakat. Jareya selako epessannagi ka engko’ molae lamba’. Ba’na ta’ daddi oreng dalmos e dhalem nyare elmo.”

”Mon sengko’ ta’ entar nyalase ka Koburan. Kadhang kaena dhateng. Lako ngaton ka engko’. Kadhang ngabassagi engko’ ban ba’na sataretan dhari pas-pasanna roma,” oca’na nyae.

Kadhang engko’ noro’ mekker bila enga’ ka odhi’na nyae. Apa se madaddi kae lako mole ka roma ban ngaton aba’na.

Polana ca’na tang guru e langgar e dhalem settong pangajaran ejellassagi ka engko’ ban mored laenna, ja’ errona oreng mate ta’ kera mole pole ka bengkona. Oreng mon la mate gun ngantos eolok ban dhuwa’ malaekat kaangguy etanya’agi bagus ban juba’na kalakowanna e bakto gi’ odhi’ e alam dunnya.

Apapole badha katerangan laen ja’ kantos are pa’polo dhari tadha’na omor, errona oreng mate ta’ kera lan-jalanan, apapole mole ka romana. Kajaba oreng wali.

"Pola tang kae maso’ wali?” ca’na engko’ e dhalem ate.

Tape engko’ ta’ kera alaban ka dhabuna nyae. ”Nyae se aladine engko’ entar ka langgar duka sakowadda mon engko’ momos se entara ngaji.”

Saellana polowan taon engko’ buru ngarte badha babulangan bagus se epadhapa’ nyae ka engko’ ban tan-taretan se ta’ kalaban rang-terrangan. Polowan taon saamponna nyae la tadha’ omor.

E dalemma eppa’ ban embu’ la tadha’ careta badha babaja ngaton. Mekkere ngatona, ja’ kadhang tadha’ se enga’a nyebbut nyamana jujuk sabban malem Juma’at.

”O, iya onggu ya. Mon aba’ ta’ arassa edhatengnge bangaseppo maske gun ngaton sakejja’, artena aba’ la loppa dha’ badhana reng towa se la nyengla dhari alam dunnya.”

”Allah!” engko’ aserro e dhalem ate. (*)

Cerpen ini dimuat di Radar Madura pada Minggu, 30 Juni 2024.

NB: Tulisan ini adalah cerpen pertama saya. Ditulis menggunakan Bahasa Madura dengan eja'an 73. 

SAEPUL, BUDHU'NA SAHRAMO !

Cerita Pendek : Fendi Chovi 

Sahramo abalangaja majang ka polo-polo sakobennga Songennep kantos dha’ morlao’na tana Jaba. Hal ka’dhinto ejalane kaangguy nyokobi pangoreban tor kasamporna’an odhi’na bine sareng na’-potona.

Bila mosem nembara’ teba, ta’ burung aba’na kodu dhep-adhebban moso guntor ngakaratap e tengnga sagara. Gageddhap lat-jiladan e attas paraona se ajal-gunjalan.

Sabatara, robiyana e bengkona arabat pottrana se gi’ kene’ tor kasohor ce’ mellerra. Saepul nyamana.

Pasera tatanggana se badha e disa se ta’ oneng ka Saepul. Tengka gulina mosse’, balessek, talebat masola. Ebuna, gasek ngakan guringnga bibir tatanggana. Sabban are ta’ tobang ngalodhu’ pamanglona bannya’ oreng.

E settong bakto, Saepul epakon ebuna kaangguy ngobange buja tor samacemma kabutowan dhapor.

“Enja’ tang ana’ rowa pajat padhana tep-kotep cellot onggu,” saodda embu’na, ngaromong sambi neggu’ dhadhana ngadhebbi babategga Saepul.

“Enja’, mon tang ana’ rowa. Sabban erosoro oreng towa, mapeggellan malolo. Areya’ dala para’ ashar gi’ ta’ dhapa’,” saodda, taker aejjaman ebuna se ngantos Saepul le-melle.

Dhari jau, Saepul etangale ajalan le-lere. Se nyamana soko, ajalan sambi nandu’-nadu’ rebba e kangan ban kacerra.

“Ba’na baramma, Na’? Ma’ lebur enga’ jareya. Maju’ ja’ pate mellak ka caca, Cong. Kaneserre reng towana,” oca’na embu’na, ta’ busen se maenga’ ka Saepul.

“Kaula tapanggi ca-kanca. Pas esoro ja’ duli paleman,” Saepul nyaot, ta’ apangrasa ja’ aba’na kalero.

“Ba iya, koduna ba’na lekkas mole. Ba’na esoro le-melle, banne esoro entar amaen. Apa pole manyaman ator-catoran e dhissa’. Ella onggu ba’na,” jawabba embu’na kalaban mata mandellik sopaja Saepul ta’ acangnga’.

**

Mon eyabassagi, pola tengka gulina Saepul gasek korang paraddu monggu tatanggana. Salaen ta’ pate bajeng entar ngaji ka langgar, Saepul gasek caccelan ngala’ dhi’-andhi’na kancana.

“Na’ kana’ rowa gampelan. Kadhang lit-julidan reng bine’,” oca’na tatanggana se badha e temor lao’na romana.

Anangeng, tatanggana tadha’ se bangala ngabala ka reng towana, tako’ seddi tor marosak tale bagussa atatangga.

Sahramo sareng robiyana seggut acabis ka kyae-kyae se badha e Kottha Songennep kantos ka Tana Jaba. Anyo’on petodu sopaja pottrana epaguli atena daddi na’-kana’ se bagus tatakramana.

La-balana Sahramo sareng taretanna robiyana ta’ hu-ambu se maenga’ sopaja pottrana sambi pangajiyagi. Otamana sabban dhapa’ ka katerbi’anna.

Sahramo gun aonggu’ sabab aba’na ngakowe ja’ aba’na dibi’ ta’ pate lancar maos Qur’an.

“Paggun ta’ kera duli nyokot. Mon reng towana dibi’ ta’ sambi aterakat. Powasae ban pangaji’i sabban mare abajang se lema bakto,” pessenna balana dibi’.

***

E settong bakto, samolena dhari Polo Kangeyan, Sahramo erabuwi ru-guruna pottrana ka compo’na.

Saongguna guruna banne gun sakaleyan tanduk kaangguy tapanggi reng seppona. Nangeng gasek ta’ apanggi. E laen bakto, guru kasebbut dhateng pole. Reng towa bine’na kateppadan ta’ kalowar roma. Sahramo kateppadan buru dhateng majang.

E palemperra romana, para ebu guru kasebbut apareng oneng tojjuwanna namoy kaangguy tor-mator ngengenge kadiponapa Saepul.

“Nyo’ona sapora, Bu. Badha ponapa enggi saenggana penjenengan sadaja tanduk dha’ kennengan ka’dhinto? Ponapa budhu’ badan kaula ngalakone parkara juba’ e sakola’an,” Sahramo mokka’ petanya jung adha’agi. Aba’na ce’ kobaterra.

“Diggal ja’ giba seyal. Abdina alonggu kaangguy asilaturahmi tor badha bak-rembak kene’ se kodu eyatorragi,” saodda guruna.

“Enggi, nyo’ona sapora manabi kennenganna ka’dhinto bak rombu tor sella’,” rajina Sahramo nolonge nyambit.

“Padha bai sareng e compo’, Bu,” jawabba guru padha saleng mamaba.

“Abdina alenggi ka kennengan ka’dhinto, aparenga oneng, ja’ pottrana panjennengan seggut ta’ maso’ ka sakola’an. Sake’ ponapa badha kapardhuwan se laen?”

Ngeding kabar paneka, binena Sahramo takerjat, asabab sapaonengan aba’na dibi’. Potrana gasek menta sango baja laggu kaangguy asakola ban dhateng baja na’-kana’ laen mole.

“Bunten, Bu. Budhu’ dan kaula mangkat sabban are ka sakola’an,” saodda Sahramo, mator kabadha’an se saongguna.

“Enggi, manabi kadipaneka, artena pottraepon jennengan ta’ dhapa’ ka sakola’an. Nangeng ka kennengan laen.”

Lebbi saejjam abidda, ru-guruna Saepul namoy, acareta kabadha’an e sakola’an kantos kabbi padha bubar.

“Sakalangkong atas rabuna, nyo’ona sapora ta’ nemmo panapa neka,” ca’na Sahramo.

***

Sahramo napet dhadha, ngedingngagi peyatoran dhari ru-guruna sakalo’anna Saepul.

Robana reng towana mendhar, aromasa ecokoco na’ potona. Ta’ lanjang careta otaba oca’, reng towana ngala’ bu-kebbu posapo lente.

“Duli olok, Saepul!!” Saodda Sahramo terro taowa kajujuranna Saepul.

Saepul se gi’ buru mole dhari amaen jujuk etanya’agi gus-bagus. “Dha’ enja gallu, Cong. Sengko’ badha parlo,” ca’na Sahramo.

“Ba’ bendherra ba’na gasek ta’ maso’ ka sakola’an ban la’-ngala’an barangnga ana’na tatangga?” Sahramo atanya, le-lere.

“Ca’epon pasera ka’dhinto, Pa’!” Saodda Saepul. Ngalenga, esanggu reng towana ta’ tao.

“Baddiyanna, tengkana ba’na enga’ jareya!”

“Ba’na entar dha’ emma ma’ bisa ta’ asakola, Cong!”. Sahramo atanya sakaleyan laggi’.

Saepul nondhu’ ta’ nyaot. Eppa’na ngabas robana akaton abak matako’.

“Bunten, ca’epon pasera, Pa’.” Jawabba Saepul pole, ngoddiya lecega ka reng towana.

Pyar!!!! tanangnga eppa’na dhapa’ ka pepena.

“Kaula toju’ e barung, Pa’.” Saodda sambi’ kalowar aeng mata. Apangrasa aba’na pajat kalero.

“Korang ajar onggu ba’na, Cong!”

Pyarrr, pyarrr, pyarrr !!!!

Sambi ngoja Saepul, Sahramo neggu’ posapo lente. Tatanggana padha kalowar dhari romana, ngedhing sowara na’-kana’ kene’ acerreng sakajana sambi nyo’on asapora. Asapora!

Saepul epapeyar-peyar ban eppa’na kantos bettessa badanna ban tanangnga beddhengan kabbi.

Saepul nyo’on sapora sapora kantos ajanji ta’ ngolangana pole kasala’anna aba’na.

“Kaula ajanji ta’ ngolangana pole, Pa’.” Saodda, sambi’ nanges arassa sake’an kabbi.

****

Sahramo saongguna ta’ mangga mokolan tor ngokom ana’na dibi’. Tape aba’na ta’ terro pottrana ta’ enthos daddi oreng mon ta’ asakola, apa pole pas andhi’ tengka ta’ bendher e budhi are.

Sela aba’na ta’ daddi pa-apa, pola na’-potona me’ pola daddi reng molja. E dhalem pekkeranna, aba’na tang-sasangsang nyare pangoreban, alako berra’. Ngarep kaodhi’anna pottrana daddi na’-kana’ se molja.

“Pajat ta’ gampang onggu daddi reng towa se bisa arabat mateppa’ guli tengkana na’-poto.” Serrona e dhalem ate.

Sahramo enga’ dha’ ka aba’na dibi’, gi’ kene’na, gasek ta’ atoro’ oca’ ka babulanganna reng towana.

“Ma’ tengkana aba’ lamba’ noron ka na’ Poto,” karettegga Sahramo dhalem atena. Apangrasa kasta.

“Aba’ lakar gasek nyake’e atena embu’.”

Saenggana, lamba’ reng towa dhuwa’na Sahramo seggut aromasa astaba, malo, tor todhus ka oreng laen ngatela’e aba’na.

“Sapora abdina Guste,” serrona Sahramo e dhalem atena, apangrasa aba’na andhi’ dusa raja ka reng towana.

NB: Cerpen di atas, yang dalam bahasa Madura disebut carpan (carèta panḍâ’), ditulis dengan ejaan hasil sarasehan 1973.

* Dimuat di Portal dimadura.id (22 Desember 2024)

PANGATERRONA NGALESSER E ATENA

Cerita Pendek : Fendi Chovi

Angen ngosap robana e naleka aba’na entar acabis ka settong Asta se kaonang pasareyanna oreng socce.

Sabellunna dhapa’ ka asta, Harim sempat posang e tengnga jalan amarga aba’na pajat ta’ toman dhapa’ sakale.

kabadha'an bunga

Pangrasana, aba’na talebat dhari jalan se etojju. Tako’ ajalan atamba jau, Harim atanya ka oreng. Toron dhari sapedha motorra, Harim ajalan. Teppa’ e adha’na barung, badha oreng towa toju’.

“Keh, Abdina nyo’ona petanya. Jalan ka Buju’ Komala ka ka’dhimma enggi?”

“Dhika entara dha’emma?” Saodda ka Harim.

“Abdina acabisa ka Asta Bujuk Komala.”

"O, saporana, bula pon ta’ pathe ngedhing. Dika loros ka lao’, dhaggi’ bakal tatemmo langgar tabing ban badha Asta e gadhiya."

Oreng towa kasebbut on-laon manjeng. Badannna ampon nonno’, nanda’agi ja’ omorra ampon ce’ seppona. Manabi etebbak, rakera pettong polo taon. Kole’ robana karekko’.

“Enggi, mator sakalangkong, Keh.”

“Ya, keng mon acabisa ka Asta ja’ gut-seggut!”

Harim takerjat ngedhing pamanggina.

“Cokop sataon sakaleyan. Ja’ libaliyan.”

Harim gun aonggu’. Atena tacengnga’ badha larangan gapaneka. Sakeng dhari kaburuna se dhapa’a ka Asta, aba’na loppa ta’ atanya maksot larangan kasebbut.

Harim ajalan nojju dha’ kennengan se etoduwagi. Nalekana aba’na ampon’ dhapa’a ka labang pagarra Asta, Harim arassa ngedhing sowara lere, dhing-gendhingan.

Sowara kalenangan ka’dhinto ce’ lantona. Harim takerjat. Pekkerra satengnga kasambu’, ta’ parcaja badha sowara oreng ngejung para’ Maghrib.

Harim gun manjeng. Bulu kole’na jaga. Rassa tako’ ngaletter e atena. Akadiya rassa seyal, kobater, ngetek padha apolong e aba’na.

Ja’ senga bisa abali, mangga’a Harim terro se moleya. Nangeng konce sapedhana elang ta’ ekarassa. Pangrasana gella’ cora’ gi’ eteggu’ e tanangnga. Pekkeranna ta’ karowan.

Harim ajalan entar ka sapedhana sakaleyan aggi’. Pola koncena ceccer cekka’ e sapedhana. Tadha’. Ta’ etemmo. Aba’na sajan seyal.

Sowarana gendhing ekaedhing tamba nyareng. Are para’ compedda. Harim mabangal maso’ ka Buju’ Komala. On-laon, sowara kasebbut elang ta’ ekarassa.

Sabelunna maso’, sabellunna acabis ngerem Fatehah, Harim manjeng, bas-abasan kabadha’an dhalem Asta Buju’ Komala. Polowan koburan, anyar laju padha ajajar neng e settong pamengkang.

Dhari pan-saponapan koburan dhalem Asta Buju’ Komala, gun settong makam se esaba’i damar kambang. Maske damar kambang abasanna mele’, nyatana ce’ bannya’na oreng alengker e seddi’na. Badha se ngaji, badha se maos tahlil. Acem-macem. Badha se maos ji-pojiyan.

Harim mokka’ tarompana, terros maso’ tor noro’ toju’. Jimet asela. Maos Yaasin, eterrosagi kalaban pan-saponapan sholawat nabbi. Laonan, rassa tako’ dhalem aba’na elang. Badanna arassa langkong tennang, langkong dammang dhari sabellunna maso’ mabangal.

Lastare ngaji, asholawat tor adu’a, Harim enga’, gella’ koncena elang. Dhu ma’ o-tao, esare pole, konce gella’ cekka’ e sapedhana.

“Guste Pangeran! Gella’ esare ma’ ta’ etemmo,” Harim akarettek dhalem atena.

Harim bangal acabis kadibi’an ka Buju’ Komala asabab badhana settong pakon dhari guruna. Pessenna, sopaja manggi jalan, du’ana lekkas katarema, sala settongnga kodu lebat jalan lannge’.

Molae lamba’, Harim ngarep aba’na katarema daddi Ponggaba Nagara. Olle kalakowan kalaban ngabdi dha’ ka Pamarenta.

Sacem-macemma cara ampon ejalane, sakeng ta’ duli bajjra takabbul. Badha bai sabab parkara se andaddiyagi aba’na ta’ gellem jaja.

Namong saka’dhinto, aba’na ta’ toman pegga’ pangarep, terros aparnyo’onan dha’ ka Guste Pangeranna. Maske li-baliyan ecokoco oreng; etepo, ejanji’i, kantos noro’ sace-macemma ujiyan nagara, buddhu buddhu bariya. Ta’ duli ngenneng. Mangka neyat dhalem atena ampon juntrong, kaangguy nekkane hajat ngengenge settong kamolja’an.

Kantos Harim enga’ ka pessenna guruna se ta’ busen nyoro, maenga’ Harim kaangguy ta’ la’-colla’ abajang, asadaka, ngerem sholawat tor maseggut nyabis ka asta-asta. Sala settongnga, enggi paneka asta se badha neng e Disa Mabunga.

Disa Mabunga, kabid jaman karaja’an Majapaet kantos mangken pajat kaonang kalaban kennenganna oreng-oreng becce’ tor socce.

Asta se emaksot guruna, enggi ka’dhinto astana Buju’ Komala. Tadha’ se onenga dha’ jejjer caretana, pasera saongguna Buju’ Komala, tor kadiponapa riwayattepon.

Kantos samangken, oreng-oreng padha asajara tor acabis ngarep barokah neng e dhalem Asta Buju’ Komala. Ta’ sakodhi’ hajattepon se katarema tor manggi jalan.

Dhabuna guruna Harim, baktona acabis kodu etandhai kalaban ponapa se kalowar dhari kerettegga’ atena.

“Mon gi’ e atena ta’ tombu karettek nyoro acabis, ella, ba’na ta’ olle entar.” Dhabuna guruna.

Harim arassa aba’na andhi’ pangaterro entara marena asar. Tadha’ jalan laen, aba’na kodu mangkat bakto gapaneka jugan.

Kabannya’an oreng-oreng e disana Harim, manabi ngagunge hajat bannya’ nyabis pandu’a ka asta.

Biyasana, emolae dhari asta bangaseppona dibi’ kantos asta-asta oreng se kaonang agung. Akadiya astana para Kanjeng Sunan se sasanga’, tor laennepon.

Nekkane hajat acabis ka Asta otaba para kyae, biyasana ejalane otamaepon oreng se towa-towa.  Katon ta’ maso’ akkal, tape ta’ sakone’ se katarema hajadda.

Samenggu abidda, salastarena dhari acabis ka Asta Komala. Harim gi’ paggun enga’ terros dha’ settong kadaddiyan se eyalame aba’na.

Asar maba, Harim toju’ e korse palemperra romana, agi’-gigi’ pessenna oreng towa tempo posang e tengnga jalan.

“Enja’ apa saongguna pessenna, ma’ ta’ olle gut-seggut acabis ka Asta Buju’ Komala?” Harim atanya ka atena dibi’.

Nalekana aba’na ta’ nemmo jawaban, Harim kasta ta’ atanya gallu maksod reng towa kasebbut.

Ma’ sakejja’ aggi’, pottrana temmo kalowar lok-ologan dhari labang.

“Pa’ … Pa’ … Pa’ … ! Ka’dhinto badha kereman sorat, gella’ para’ seyang. Ca’epon kereman dhari lowar kottha.”

“Sorat dhari dimma, Cong?”

“Ta’ oneng, Pa’. Abdina narema bisaos.”

“Iya kemma, giba kanna’ sorat jareya.”

“Neka’!” Pottrana jujuk ngatorragi sorat gella’.

Harim takerjat campor bunga naleka maos sorat kasebbut, Asabab essena e dhalem soradda menangka jawaban dhari lamba’ se daddi pangarep hajadda.

“Kalangkong Guste !!!”

“Engko’ tekka hajat, Na’ !”

“Engko’ tekka hajat, Na’ !”

Harim perak aorak ka ana’na. Aengmatana nyapcap ta’ egarassa.***

NB: Cerpen di atas, yang dalam bahasa Madura disebut carpan (carèta panḍâ’), ditulis dengan ejaan hasil sarasehan 1973.

*) Fendi Chovi, babar e Songennep. Lebur nganggit careta. Pan-saponapan ongkas serradanna terbi’ daddi buku, ngombar e media cetak tor media online.

NGAJUM KAEMBA'AN KA NA'- POTO

Cerita Pendek : Fendi Chovi 

Ra’-tera’ tana. Sakejja’ aggi’ are ngombar. Na’-kana’ jareya gi’ ta’ jaga dhari katedhunganna. Oreng tane ella padha atong-rontong, mangkat alako ka tengnga teggal. Kana’ jareya gi’ paggun ngeppe’ guling, paggun ngerrok ngasower!

Ilustrasi : Rassa emba ka na'-poto

Bannya’ kancana se saomoran ban sakellas la padha mangkat asakola. Ta’ jamburungan, mowana reng towana, mendhar, nengale ana’-na ma’ se molae gella’ mola gi’ manyaman agellu’ bantal. Malekko’.

“Cong! Ba’na ta’ mangkada asakola, ya …! “

Ta’ nyaot. Gun ekaedhing sowarana oreng ngerrok dhari dhalem kamar.

“Cong, ba’na ma’ gi’ ta’ jaga, Cong!“

“Cong. Duli jaga, dhaggi’ la epokol ebesbes ba’na mon engko’. Ma’ mon tedhung laju ngala’ sanyamana,” saodda eppa’na dhari lowar labangnga.

Ana’ kasebut gi’ ta’ jaga. Ta’ laten ngabasagi ana’-na, Markab reng towana, dhu ma’ pas ngala’ posapo lente, epokollagi ka sokona.

“Sake’, Pa’!”

“Toman onggu! Korang ajar, ba’na. Kol barampa satea, ma’ gi’ manyaman tedung,” Markab agigir ce’ lantona.

Ana’ kasebut jaga, ban pas buru ngagaludus ka dhalem jeddhing.

“Duli mangkat! Sanggu eyalemma jagana. Man manyaman tedhung la bajana maso’ asakola,” atena Markab olle bak anga’.

Banne gun sakaleyan dhukale na’-kana’ jareya olle guringnga bibir dhari reng towana. Asabab, pajat ta’ pate ngongguwagi mon esoro nyare elmo.

Sulla, nyamana. Tape sabagiyan kancana ngolok kana’ jareya kalaban jajjuluk ‘Se Longor’.

Pasalla, sabban are, na’-kana’ jareya lako dhateng tellat ka sakola’an. Kabbi guruna taker apal ka nyamana, banne polana penterra, tape polana aba’na lako dhateng aban ka sakola’an.

Andhi’ na’-poto cengkal ban ngabassagi kalakowan ana’-na se ta’ pate atoro’ oca’, reng towana molae nyare akkal; baramma kerana ana’ bisa ambu meller, ta’ cengkal pole.

Markab mekker, kacengkalanna ana’na ella cokop onggu marodek pekkeranna.

Tello are sabellunna. Markab etompo oreng. Ana’-na epokol Sulla bakto ngaji.

Markab ta’ alaban. Tako’ daddi tokar raja. Aba’na ngala kalaban nyo’on sapora atas kakalerowanna ana’-na.

“Enggi. Bula nyo’ona sapora, manabi budhu’ kaula badha kakalerowan.“

“Iya, oddi ana’na balai! Ma’ ta’ biyasa lako la-nyala ka oreng laen,” gigirra oreng kasebbut ce’ nyarengnga. Palempengan!

“Enggi.”

Ongguna, atena arassa galgal. Sakeng Markab paggun teggen. Ja’ sakenga Markab alaban, kabadha’an bakto jareya tanto daddi tokar raja.

***

Ngadebbi pottrana, Markab menta nasehat dha’ ka tan-taretanna. Bannya’ macemma nasehat ban pamanggi. Sala settongnga nyoro Markab sopaja ngabareng pottrana nyabis dha’ reng socce.

Markab mereng kabar, ja’ saongguna badha settong dhukon se andhi’ kajunelan nanambanen. Dukon jareya kalonta kalaban asma, Kyae Marjali–se ca’na kabar dhari reng-oreng, kyae jareya ta’ guna mandi nambain oreng sake’, bali’ junel jugan nanambain na’-kana’ mangan.

Tello are saellana ngedhing kabar, Markab, reng towana Sulla, mangkat entar nyabis ka dalemma Ke Marjali.

Kala’ lekkas, dhapa’ ka dalemma Ke Marjali, Salerana laggi’ aseram, amarga ca’epon tamoy se laen, Salerana buru mare aladin jaranna. Tamoy se dhateng epakon ngantos.

“Nyabis pamator Keyae. Abdina Markab."

“Enggi, dhari ka’dhimma?.”

“Abdina dhari Disa Tolengkar.”

“Enggi, badha kaparlowan ponapa?”.

“Cangkolang Keyae. Abdina terro nyo’ona pandu’a sareng petodu kaangguy mabaras kacengkalanna budhu’ abdina.”

“Enggi, ponapa se ekalako pottrana sampeyan? Ngeco’an, ta’ lebur mole ka roma, ponapa keng pera’ lebur aganggu oreng?”.

“Bunten, Keyae, gun ta’ pate lebur asakola, ban ka’dhissa’ biyasa acangnga’ dha’ ka abdina.”

Keyae kasebut gun aonggu’ ban mesem sambi aosap meret janggu’na.

Keyae Marjali apareng Aeng.

“Aeng reya enommagi ya, ka pottrana. Neyattagi sopaja ta’ mellera pole.”

“Enggi, Keyae.”

“Ban reya’ pole, mon bisa ana’-na ja’ lako giggiri e tempo alako sala. Cokop paenga’ ban contowe kaangguy ngalakone parkara bagus.”

“Enggi”.

“Dha’ ka pottrana, ajja’ kaloppae, pabajeng duwa’agi, sareng ajja’ adha-kandha parkara se daddi conto dha’ aba’na.”

“Enggi”.

Sameller-mellerra ana’, reng towa kodu bisa ngajum kaemba’an, pareng babulangan becce’, menangka jimat dha’ na’-poto dhalem ngadebbi kaodhi’an.

“

“Enggi, Keyae.”

“Iya, moga-moga daddi jalan kabagusan. Senga’, ajum kaemba’anna dha’ ka na’-ana’ potona.”

“Enggi. Abdina nyo’ona pamit.”

****

Malem jareya tera’ bulan, Markab toju’ e amperra romana. Mekkere ban ngenga’e dhabuna Keyae Marjali.

Pakonna Ke Marjali, na’-kana’  kene’ ta’ olle giggiri bi-talebbi. Mon mokola, cokop e bakto ta’ ngalakone parenta abajang. Na’-naka’ se lako egiggiri bakal daddi na’-kana’ dhumeng.

“Cokop paenga’ ban contowe.” Pekkerra Markab akarettek.

Ta’ egarassa, aengmatana Markab gaggar bila enga’ ka pessenna Ke Marjali. Asabab, aba’na pajat angrang aberri’ conto se teppa’, ponapa pole maenga’ ana’na tempo agabay tengka sala.

Markab apangrasa, bakto adha-kandha ban ana’na pajat abak rang-rang. Aba’na lako emo’ kalaban kalakowanna dibi’.

“Ba’na arapa ma’ nanges, Pa’?” Oca’na Sulla ka eppa’na ta’ kalaban abasa.

Markab takerjat ngedhing petanyana Sulla, ana’na.

“Baa, ba’na la dhateng dhari langgar, Cong! Areya kan gi’ ta’ adzan?”

“Iya, Pa’. Engko’ lesso la se ngajiya.” Saodda ta’ kalaban abasa ban apangrasa sala.

“Arapa, Cong?”

“Iya enja’, sakeng la lesso, Pa’!”

” Baa.. Ella, ba’na mon ta’ ngaji, dhaggi’ daddi na’-kana’ se ta’ tao pa-apa, Cong. Satea baktona ba’na asakola pabajeng.”

“Ba’na pelka’? Areya’ aeng enom gallu. Ma’ ba’na akaton ngangsor. Pola berka’ maburu dhari Langgar.”

Ma’ se nyamana aeng ju pas edhakdhak. Sagellas sakejja’an. Tadha’ karena sakale.

Mare. Se kadhuwa, eppa’ ban ana’ pas toju’ ator-catoran e amperra romana.

Ngabassagi ana’na, saongguna Markab pajat ngarep, ana’na bakal daddi oreng molja.

“Cong. Engko’ arapa ma’ lako agigir ka ba’na? Saongguna eppa’ eman mon ba’na ta’ tao pa-apa dhaggi’ bila towa.”

Sulla ta’ ajawab. Gun nondhu’.

“Mon badha reng towa agigir, jareya tandhana esto, eman ka ana’na. Pangarep daddi ana’ se bajjra.”

Sulla paggun nondu’. Paggun ta’ ajawab.

“Sateya baktona ba’na ajar pabajeng nyare elmo. Mon ba’na bajeng, sengko’ ta’ kera lako agigir ka ba’na.”

Sajjegga mabiyasa adha-kandha. Sulla ana’na Markab, ma’ pas lebur acareta ka eppa’na sabban badha pa-apa e sakola’anna.

E dhalem atena, Markab ngatorragi pandu’a kalaban pangarep se raja.

Dhu, Guste Pangeran! Abdina nyo’ona mandar ana’ abdina olleya elmo se barokah. Daddi jalanna kasamporna’an e dhalem odhi’na. Pareng ana’ abdina rajekke se nyokobin kabutowan kaodhi’anna. Sadaja ponapa se daddi hajat. Daddi na’-poto se ngabakte dha’ ka reng towa dhuwa’. Amiiiin!

NB: Cerpen di atas, yang dalam bahasa Madura disebut carpan (carèta panḍâ'), ditulis dengan ejaan hasil sarasehan 1973.

*) FENDI CHOVI, babar e Kottha Songennep. Lebur nganggit careta pandha’ (Carpan). 

(Cerpen dimuat di Portal Dimadura.id pada tanggal  20 Juli 2024)

PANTUN MADURA

 

Nètèbâ Bulân

Seradhânèpon : Fendi Chovi*

Ilustrasi @akirakusaka

Toju' ngènga'è parkara sè rowet. Èpul ampon ma abi' dhugellas cangkèr kopi.

Nèyat ka angghuy abânto tarètanna sè kala amàen judi.

"Enjâ', bhârâmma tang alè' rèya ma' ghâmpangnga amaèn parkara sè bhâbbhâjâ," aserro Èpul ḍâlem atè.

Alè'na ngako kala amaèn judi. Sertifikat tana bân dunnyana rèng towana sè dhâddhi tarowân.

Èpul rowet mèkkèrè kalakowan alè'na.

Sampè' Èpul Loppa, jhâ' bâdâ telpon dâri Liana.

Liana, panèka ponakanna èpul. Sala sèttong rèng binè' se alos tèngka ghulina. Mèsemma dhâddhi ghâgghâr tèra'na bulân.

"Bâdâ apa Liana, sapora èngko' ghi' sibuk?" Ca'na Èpul.

"Enjhâ', Om." Nyaot Liana.

"Kaulâ èpakon ummi ka angghuy atanya ka bâdâ'anna sampèyan," Liana ajâwâb polè.

" Ènjhâ' engkok ta' Arapa, ghun abâ' rowet pekkèran ecapo' masalana alè'," Èpul ajâwâb.

" Dhina pasabbhâr, om."

Caèpon Ummi, sampèyan lagghuna èso'ona longgguna è Roma. Bâdâ rembhâg kènè'.

" Iya, siyap," ca'na Èpul.

Sambi' toju' èyadhâ'na Amper Romana, Èpul ngabhâs bulân sè tèra' ...

"Ḍu, bulân cè' lèbhurrâ, yâ !

Samoghâ tadâ' orèng ajudii kalabân tarowân bulân è langè'.

" Nyo'ona nètèbâ bulân jhâ' sampè' èlang," Èpul ngarèp sambi' aserro.

Bulân ngombâr, tèra' tar kataran ... !

* Sèttong na'-kana' ngodhâ sè lèbhur maos bhuku.

Abit Oḍi' Ta' Apolong

Ilustrasi @my_soulwax

Arè ngamèra è bârâ' amarghâ bâjâ Maghrib ampon toron. Sowara orèng adzân ḍâri Loudspèkèr Langghâr ampon è kaèdhing.

È bâjâ ka' ḍinto bâdâ rèng towa sè lako kèrrong ḍâ' ana' binè'na sè alako jâu ḍâri Roma. Èngghi ka' ḍinto ka tana jhâbâ.

Vira, nyama rèng binè' kasèbhut. Ka' ḍinto lakar rèng binè' sèmanès robhâna tor bhâghus tèngkana.

Vira mènangka sèttong rèng binè' dâri Songennep ampon abit ta' palèman ka Madhurâ. Para' tèllo taon bâḍâ è tana Jhâbâ.

Saamponna kalowar ḍâri sala sèttong Perguruan Tinggi nyarè èlmo. Vira nyarè kalakowan è jhâbâ dhâddhi tokang tolès è Bhârung sè ajhuwal cèm-macèmma parabudhân. Molâe kakanan, bârâng kantos kalambhi.

Rèng towana Vira arassa kèrrong. Vira ghun bisa nelpon bân ngabârraghi kabâḍâ'ânna.

"Dhân kaulâ, Alhamdulillah sehat, bhu', caèpon Vira dâ' rèng towa binè'na.

Èppa'na noro' bhungâ è bâkto ngèdhingngaghi potrèna sè talèbât Raddhin akabhâr sèhat.

" Mon bâḍâ apa-apa akabhâr yâ, nak. Èbhu' sèyal bân ta' tennang. Sabâb satèya bânnya' orèng-orèng sè ta' bhâghus," caèpon èbhu Vira.

" Bâ'na rèng binè' bân èngko' lako sèyal mon bâ'na taḍâ' kabhâr," caèpon èbhu Vira kalabân ana' binè'na kaparèng salamad.

"Èngghi, èbhu," jawâb Vira.

Nyoona sambhungan pandu'a malar moghâ dhân kaulâ lancar ngalakonè kalakowân ghâpanèka.

È ḍâlem atè, saèstona Vira anḍi' pangarep bisa ollè kalakowân è Sumenep. Sabâb salaènna sèmma' dâ' rèng towa. Jughân bisa apolong bân tan-tarètan sèlaèn.

"Moghâ taon sè bhâkal ḍâteng katarèma dhâddhi PNS sopajâ bisa apolong bân rèng towà è Sumenep," panyoon Vira è ḍâlèm atè.

Vira ajhânjhi è ḍâlem atè, bhâkal ambhu saamponna bisa mapolong pèssè ka angghuy biyaya akabhin dâ bhudi arè.

Vira ta' terro marèpot polè ḍâ' ka orèng towana sè masakola kantos tamat akuliyâ. 

Nèyat Vira saka' ḍinto nyarè lako kantos ka tana jhâbâ. Sèttong parjungan rajâ.

Lastarè akuliyâ, Vira adaftar PNS tapè ta' pojhur alias ta' katarèma. Saèngghâna Vira alako dhâddhi bagiyân administrasi è sèttong bhârung kalabân gaji sè cokop.

Bilâ èpèkkèr polè, ta' sala mon orèng towa arassa kèrrong amarghâ polowan taon abit oḍi' ta' apolong. 

ḍu ... Bâremma rassana atè dhâddhi ana' jau ḍâri rèng towa ...

Sèrradhân : Fendi Chovi 

Bumbungan, 2024