Ghunana Ajhâr Ondhâgghâ Bhâsa

Sala sèttong sè langkong otama è ḍâlem ajhâr nyerrat ngangghuy bhâsa Madhurâ panèka ngaonèngè dâ' onḍhâgghâ bhâsa sè biyasa è ghuna'aghi è ḍâlem dha-kandhâ rè-sa-arèna.

Ngaonèngè onḍhâgghâ bhâsa jhâ' parlona. Amarghâ pangaonèngan ka' ḍinto èkaparlo manabi kaulâ sarèng sampèyan nyabis otaba tapangghi sarèng orèng sè moljhâ otabâ èmoljhâaghi otabâ langkong sèppo.

Nyoprè jhârna' ngèngèngè ondhâgghâ bhâsa, nyara kaghâli jhâjhârbâ'ân è bâbâ ka'dinto ...

 1.  Ondhâk Anḍhâp / (bhâsa enjâ' iyâ)

Acaca (berbicara)

Anḍi' (memiliki)

Engko' anḍi' ajâm potè

(Saya memiliki ayam berwarna putih)

 2.  Ondhâk Tengnga/ (bhâsa engghi enten)

Mator (berbicara)

Ghâdhuwân (memiliki)

Kaulâ ghâdhuwân buku Bâbâd Songènnep

(Saya memiliki buku Bâbâd Sumenep)

3.  Ondhâk Tèngghi/ ( Bhâsa engghi bhunten)

Adhâbhu (berbicara)

Ngaghungè (memiliki)

Kaula ngaghungè Mobil anyar

kaulâ ghâdhuwan Mobil Anyar 

Panjhenengan ngaghungè sapè Limosin?

Sopaja lebbi ngaonèngè otabâ onèng kaulâ bân sampèyan lakar kodhu bânnya' latèyan. 

Nyara mèyarsa'aghi dhâ-dhâbu orèng-orèng towa kona sè ghì' sekken ngangghuy Bhâsa Madhurâ.

(Agghidhân Fendi Chovi )

Bumbungan, Bluto (2024)

Pantun Madhurâ Angghidhân Fendi Chovi

 

Ngantos Bulân Powasa

Ilustras : @heartmecca

È bulân Maret è Taon 2024 samangkèn Ommat Muslim otabâ orèng Islam bhâkal ajâlânnaghi ibâdâ Powasa Ramadhân.

Dhâ' Ommat Moslim sè oḍi' è nâghârâ Indonèsia. Ngadhebbi bulân Powasa sè ghânjârân èpon talèbhât rajâ panèka kodhu ongghu-ongghu. 

Parlo èkaonèngè cè' parmolaan Powasa è naghârâ Indonesia antara Mohammadiyâ bân Nahdlatul Ulama ta' padhâ.M

Mohammadiyâ bân NU panèka dhuwâ' organisasi Islam sè nyoprè paraddhu dhâ' ommat.

Kapotosan dâri Pengurus Pusat Mohammadiyâ èkala' lebbi ngadâ'. Manabi NU lebbi modhi. Maksotèpon, Mohammadiyâ arè Senin. NU Noro' Pamarènta èkala' arè salasa.

Ta' onèng manabi arè lebhâran tellasanèpon. Napa pagghun bidhâ otabâ padhâ. Napa laèn jughân bâktona.

Parlo èkaonèngè jhâ' Bulân Powasa panèka sèttong bulân sè talèbât rajâ ghânjârenèpon. Manabi èghuna'aghi apowasa sareng masemma' abâ' dhâ' Ghustè Pangèran.

Salaèn ka' dinto, ngalakonè Powasa jughân sèttong kawajibân dhâ' orèng Islam sè ampon mokallaf. Amarghâ apowasa dhâddhi gher-ogherrâ orèng Islam sè nomer empa', Ka' dinto ajhâlannaghi ibâdâ powasa.

Paramèla ka' dinto bâdhân kaulâ cè' jhembârrâ manabi kaparèng omor lanjhâng ka angghuy ngalakonè ibadâ powasa.

Caèpon bhu-dhâbhu : paserâ sè ghumbira ngantos dâtengnga Powasa, maka orèng ka' dinto bhâdhânna è harammaghi ècapo' Apoy naraka.

Èyatorè. Abdhina nyo'ona samoghâ bulân Powasa taon samangkèn panèka dhâddhi jhâlân bhâgussâ amal è ḍunnya tor akhèrat.

Jhâ' tako' apowasa. Karna apowasa madhâddhi abâ' sèhat. Orèng sè bhâjheng apowasa bhâkal sèhat.

Jhâ' tako' apowasa. Karna Powasa jhâlân dhâddhi orèng sè èkalèbhuri ghustè pangèran.

Saka' dinto dhimèn tolèsan Ngantos Powasa panèka. Moghâ ghâdhuwân manfaat.

Serradhân : Fendi Chovi

Nyandâ' Rajhekè, Nyoprè Oḍi' Saè

 Serradhân : Fendi Chovi*

Nompa' mobil ka bintaro. 

Nyàre jhuko' ka gir sèrèng. 

Mon dika oḍî' terro pèngaro. 

Jhà' loppà èngà' dâ' ka sè Aparèng

Ilustrasi @naosverse

Angghidân panèka èkabidhi kalabân sèttong pantun sopajâ abâ' dhâddhi ènga' dhâ' Pangèran sè amorbhâ jâghât.

Bânnya' orèng loppâ. Jhâ' rajhekè ta' dâteng ros-terrosan dâri kalakowan. Rajhekè jughân dâteng dâri papareng pangeran sè Maha Kobâsa.

Maskè ghâpanèka, kelassa Ajunan bân kaulâ ta' padhâ. Manabi ta' alako tolos rajhekè kaulâ bân Ajunan bhâkal serret.

Tapè Ongghu bâdâ orèng ta' alako tapè rajhekè èpon kalowar kalabân jhâlân sè ta' èsangka-sangka.

Papareng ka' dinto biyasana tèbâ polana abâ' anḍi' amal kabhâgusan sè dhâddi lancarra rajhekè.

Manabi ta' parcajâ. Èyatorè oladhi oḍi'na orèng sè ta' patè anḍi' lako padhâna orèng sè biyasa alako. Nàmong rajhekè morbhur kalowar padhâna somberra aèng sè rajâ.

Contona padhâna pasèra?

Misalèpon para ulama sè ghun ghâdhuwan kalakowan moro' ngajhi. 

Orèng ghapanèka biyasana ghâdhuwan amalan sè katarèma kalabân semma' ka sè Aparèng rajhekè.

Paramèla ka' dinto manabi Ajunan terro andi'â rajhekè sè rajâ. Nyoprè jhâlân dâtengnga rajhekè lakonè !

Nàmong jhâ' sampè' ngalakonè kalakowan jhubâ' sopajâ abâ' ta' dhâddhi kastana, contowèpon arajâ (nyarè dunnya kalabân ngabdhi dhâ' Setan otabâna Jin).

Kaulâ sareng Ajunan, koḍhu nyandâ' rajhekè, nyoprè oḍi' saè koḍhu èjhâlânè parèntana pangeran sè Maha Soccè.

Sala sèttongnga koḍhu alako. Alako kalabân nèyat nambhâ'âna rajhekè jughân nyarè hasèl sè saè.

Samoghâ abdhina bân Ajunan Kaparèng kasalameddhân tor oḍi' Kalabân tèngka sè sèpa' dhâ' maghârsarè !

* Ngabidhi ajhâr kalabân notorraghi bhâsâ Madhurâ 

Nètèbâ Bulân

Seradhânèpon : Fendi Chovi*

Ilustrasi @akirakusaka

Toju' ngènga'è parkara sè rowet. Èpul ampon ma abi' dhugellas cangkèr kopi.

Nèyat ka angghuy abânto tarètanna sè kala amàen judi.

"Enjâ', bhârâmma tang alè' rèya ma' ghâmpangnga amaèn parkara sè bhâbbhâjâ," aserro Èpul ḍâlem atè.

Alè'na ngako kala amaèn judi. Sertifikat tana bân dunnyana rèng towana sè dhâddhi tarowân.

Èpul rowet mèkkèrè kalakowan alè'na.

Sampè' Èpul Loppa, jhâ' bâdâ telpon dâri Liana.

Liana, panèka ponakanna èpul. Sala sèttong rèng binè' se alos tèngka ghulina. Mèsemma dhâddhi ghâgghâr tèra'na bulân.

"Bâdâ apa Liana, sapora èngko' ghi' sibuk?" Ca'na Èpul.

"Enjhâ', Om." Nyaot Liana.

"Kaulâ èpakon ummi ka angghuy atanya ka bâdâ'anna sampèyan," Liana ajâwâb polè.

" Ènjhâ' engkok ta' Arapa, ghun abâ' rowet pekkèran ecapo' masalana alè'," Èpul ajâwâb.

" Dhina pasabbhâr, om."

Caèpon Ummi, sampèyan lagghuna èso'ona longgguna è Roma. Bâdâ rembhâg kènè'.

" Iya, siyap," ca'na Èpul.

Sambi' toju' èyadhâ'na Amper Romana, Èpul ngabhâs bulân sè tèra' ...

"Ḍu, bulân cè' lèbhurrâ, yâ !

Samoghâ tadâ' orèng ajudii kalabân tarowân bulân è langè'.

" Nyo'ona nètèbâ bulân jhâ' sampè' èlang," Èpul ngarèp sambi' aserro.

Bulân ngombâr, tèra' tar kataran ... !

* Sèttong na'-kana' ngodhâ sè lèbhur maos bhuku.