Pentigraf. Sala séttong jhâlân ka angghuy ngangghit carèta sè ghun bhuto Tello Paragraf.
Pentigraf ka' ḍinto akronim ḍâri (Cerpen Tiga Paragraf) sè èkennalaghi sareng Dr. Tengsoè Tjahjono.
Kalabân Pentigraf ka' dinto, Para maos bisa nyerrat careta pandâ' ngangghuy bhâsa Madhurâ.
Para maos bisa ngàbidhi carèta sè bâḍâ èkaoḍi'ânna bhâng sè bhâng. Èyatorè !
Panèka contowèpon Pentigraf. Èyatorè manabi kasokan ka angghuy maos !
È tanggâl lèma bellâs bulân Januari 2024, bhâdhân kaulâ sarèng rèt-morèt ollè undângan ka angghuy hadir dâ' acara Edu Fair Sumene otabâ 'Pameran Pendidikan' sè lampaaghi sareng MGBK (Musyawarah Guru Bimbingan Konseling) kabhupatèn Songennep.
Bânnya' 'Perguruan Tinggi' sè hadir ka angghuy akennallaghi 'Kampus' èpon dâ' ka rèt-morèt sè kabhupaten Songennep.
Perguruan ka' ḍinto ḍâri kabhupaten Songennep, Pamekasan, jughân ḍâri lowar Madhurâ sè ampon kalonta amarghâ dhâddhi 'Kampus Favorit'.
Orèng nomer sèttong è Kotta Songennep, Haji Achmad Fauzi Wongsojudo jughân hadir.
Cak Fauzi, pangghilannèpon mènangka bhupati Songennep è kotta sè èkennal kalabân sèbbhutan kotta Kerris.
Rèt-morèt sè hadir cokop bânnya'. Lebbi saèbu rèt-morèt ḍâri cem-macemma sakolaan è Kotta Songennep.
Bhâdhân kaulâ ghun terro ngarsip 'nyimpenna' pan-saponapan ghâmbâr otabâ foto è acara ka' ḍinto.
Èyatorè, mi' pola panjhenengan kasokan ka angghuy ngoladhi ....
 |
| Ilustrasi @my_soulwax |
Arè ngamèra è bârâ' amarghâ bâjâ Maghrib ampon toron. Sowara orèng adzân ḍâri Loudspèkèr Langghâr ampon è kaèdhing.
È bâjâ ka' ḍinto bâdâ rèng towa sè lako kèrrong ḍâ' ana' binè'na sè alako jâu ḍâri Roma. Èngghi ka' ḍinto ka tana jhâbâ.
Vira, nyama rèng binè' kasèbhut. Ka' ḍinto lakar rèng binè' sèmanès robhâna tor bhâghus tèngkana.
Vira mènangka sèttong rèng binè' dâri Songennep ampon abit ta' palèman ka Madhurâ. Para' tèllo taon bâḍâ è tana Jhâbâ.
Saamponna kalowar ḍâri sala sèttong Perguruan Tinggi nyarè èlmo. Vira nyarè kalakowan è jhâbâ dhâddhi tokang tolès è Bhârung sè ajhuwal cèm-macèmma parabudhân. Molâe kakanan, bârâng kantos kalambhi.
Rèng towana Vira arassa kèrrong. Vira ghun bisa nelpon bân ngabârraghi kabâḍâ'ânna.
"Dhân kaulâ, Alhamdulillah sehat, bhu', caèpon Vira dâ' rèng towa binè'na.
Èppa'na noro' bhungâ è bâkto ngèdhingngaghi potrèna sè talèbât Raddhin akabhâr sèhat.
" Mon bâḍâ apa-apa akabhâr yâ, nak. Èbhu' sèyal bân ta' tennang. Sabâb satèya bânnya' orèng-orèng sè ta' bhâghus," caèpon èbhu Vira.
" Bâ'na rèng binè' bân èngko' lako sèyal mon bâ'na taḍâ' kabhâr," caèpon èbhu Vira kalabân ana' binè'na kaparèng salamad.
"Èngghi, èbhu," jawâb Vira.
Nyoona sambhungan pandu'a malar moghâ dhân kaulâ lancar ngalakonè kalakowân ghâpanèka.
È ḍâlem atè, saèstona Vira anḍi' pangarep bisa ollè kalakowân è Sumenep. Sabâb salaènna sèmma' dâ' rèng towa. Jughân bisa apolong bân tan-tarètan sèlaèn.
"Moghâ taon sè bhâkal ḍâteng katarèma dhâddhi PNS sopajâ bisa apolong bân rèng towà è Sumenep," panyoon Vira è ḍâlèm atè.
Vira ajhânjhi è ḍâlem atè, bhâkal ambhu saamponna bisa mapolong pèssè ka angghuy biyaya akabhin dâ bhudi arè.
Vira ta' terro marèpot polè ḍâ' ka orèng towana sè masakola kantos tamat akuliyâ.
Nèyat Vira saka' ḍinto nyarè lako kantos ka tana jhâbâ. Sèttong parjungan rajâ.
Lastarè akuliyâ, Vira adaftar PNS tapè ta' pojhur alias ta' katarèma. Saèngghâna Vira alako dhâddhi bagiyân administrasi è sèttong bhârung kalabân gaji sè cokop.
Bilâ èpèkkèr polè, ta' sala mon orèng towa arassa kèrrong amarghâ polowan taon abit oḍi' ta' apolong.
ḍu ... Bâremma rassana atè dhâddhi ana' jau ḍâri rèng towa ...
Sèrradhân : Fendi Chovi
Bumbungan, 2024
Ta' bânnya' orèng sè bhisa nolès carèta pandhâ' (Carpan). Ponàpa polè nolès ngangghuy bhâsa Madhurâ sè lakar ta' èghunaaghi è ḍâlem rè-sa-arèna.
Bânnya orèng sabelunna nolès sè arassa lèsso, akaton tadâ' ghunana jughân apàngrasa malarat èbâkto ngangghit carèta.
Sèrradhân è blog dhân kaulâ panèka bâdhi ajhârbhâaghi caraèpon Nyerrat Carpan sè bhisa è ghuna'aghi pandhuman sopajâ maghâmpang dâ para maos.
Mi' pola kalabân abâ' lèbur nolès carèta dhâddhi sala sèttong jhâlânna rajhekkè sarèng èkennal orèng.
Panèka pandhuman Nyerrat Carpan è ponḍhut ḍâri bhuku Bhâsa Sangkolan Bhâsa Madhurâ.
Pandhumân ka' ḍinto sarèng bhâdhân ètolès polè kalabân lebbhi rèngkes.
Nomer sèttong : Nantowaghi Bhâb Parkara sè èkacarèta (Tema)
Saè mèlè tema sè ghâmpang ka angghuy è sèrrat dhâddhi carèta. Maksottèpon koḍhu nyarè tema sè èkaonèngè sarèng abâ' sè bhâkal ètolès. Ompama, bhuḍhâjâ, kamèskènan, kamardhika'an, kaoḍi'ân è dhisa otâbâ è kotta.
Nomer dhuwâ' : Nantowaghi nyama-nyamana panjhâk
Nantowaghi nyamana panjhâk koḍhu akor sarèng èssèna otabâ kabâḍâ'ân ḍâlem carèta. Ompama orèng Madhurâ, orèng Dhisa tanto nyamana koḍhu ngakorraghi sarèng kabâdâ'ân.
Nomer Tèllo' : Nantowaghi Jhâlânna Carèta/ Alur
Alur panèka bâḍâ tèllo' macem, èngghi ka' ḍinto alur majhu, alur nyorot/abâli, alur nyorot-nyandher.
Nomer Empa' : Onḍhâgghâ Bhâsa
Tanto ḍâlem ngangghit carèta parlo èkaonèngè onḍhâgghâ bhâsaèpon ta' kantos sala èghuna'aghi, jughân èjhâ'ânnèpon jhâ' kantos sala otabâ kalèro. Koḍhu ngangghuy èjhâ'ân sè noro' pandhuman ÈYD sè ampon èyessaaghi sarèng Balai Bahasa Jhâbâ Tèmor. Cokop kalabân ngangghuy bhâsa rè-saarè sopajâ ghâmpang ngartè dâ' èssèna carèta.
Nomer Lèma' : Nantowaghi Bhul-Ombhul
Bhul-ombhul bisa ètantowaghi saamponna carèta lastarè èserrat otabâ sabellunna èserrat. Bhul-ombhul ebhâḍhi kaangghuy aghâmbârraghi èssèna carèta.
Bisa jughân ka angghuy madhâddhi orèng otabâ para maos kasokan kaangghuy maca carèta kasebbhut. Koḍhu aghâbáy bhul-ombhul sè cè' lèburrâ !
Serradhân : Fendi Chovi
 |
Bhâremma rassana dhâddhi ghuru ngajhi?
Dhâddhi ghuru ngajhi ka' ḍinto sala séttong kalakowan moljhâ. Amarghâ orèng ghâpanèka kaparèng pakon ka angghuy ngopènè na'-kana' sopaja bisa maos al-Quran.
Namong dhâddhi ghuru ngajhi kalabân tambâ'ân dhâddhi pangladhin Langghâr ka' ḍinto parkara sè talèbât berrâ'.
Orèng sè kaparcajâ dhâddhi pangladhin langghâr ghâpanèka bhâkal dhâddhi orèng moljhâ. Amarghâ anḍi' kalakowan sè abherri' pètoḍhu dâ' ommat è ḍâlem ajhâlânnaghi parèntana agama.
Hal kasèbhut è karassa dhân kaulâ jughân. Saèstona abâ' ta' kèra nola' manabi èpakon molang ngajhi. Tapè, cè' berrâ'na manabi abâ' jughân kaparèng pakon aladhini langghâr.
Hal ka'dinto bâgiyân ḍâri arabât dhâdhingghâllânèpon bângasèppo sè ampon sobung omor.
Abâ' arassa berrâ'. Amarghâ èlmo ghi' ta' cokop dhâddhi orèng sè ghâḍhuwân jhâlân matèra' na'-kana' kènè' ajhâr alif-lam-mim è ḍâlem maghârsarè.
Abâ' arassa berrâ' amarghâ ta' biasa oḍi' atoghu langghâr molaè bâjâ Maghrib kantos bâjâ Isya'.
Malar moghâ abdhina anḍi' tambâ'ân èlmo sopajâ ta' lopot è ḍâlem ajhâlânnaghi sèttong parkara sè anḍi' tangghung jawab rajâ mongghu dâ' ommat tor Ajunan.
Abâ' sè ta' kellar pakellaraghi.
Sambi' ngoladhi èssèna langè' abâ' ènga' dâ' pesanna ghuru è pondhu' :
Santrè mon la molè ka masyarakat, jhâ' tako' dhâddhi ghuru !
Fendi Chovi